Բամբասում են երկու գորշ սարդ,
Փնովում տան հին ավելին.
– Չար վհուկ է, չորուկ կախարդ
Այս մազաթափ, խեւ մաքրուհին:
4
Քստքստալով պտտվում է,
Իբր սրբում անկյուն ու պատ,
Արածն իր պես՝ փնթի-մնթի,
Ամեն գործը՝ կիսատ-պռատ:
Իսկ մենք սարդ ենք, պատի զարդ ենք,
Հյուսում ենք նուրբ ոստայն ու ցանց,
Բազմում ենք միշտ վերեւներում
Ու վերից ենք նայում ոմանց:
Այնքան անցան չափ ու սահման
Մեծաբերան գորշ սարդերը,
Մինչեւ մի օր չդիմացան
Խեղճ մաքրուհու պիրկ նյարդերը:
– Ինչքա՞ն պիտի տգետներն այս
Զազրախոսեն անկյուններում,
Զարմանում եմ ես ինձ վրա,
Թե ինչու եմ անվերջ ներում:
Ասաց ավելն ու ձգվեց վեր,
Այնպես տվեց մի զիլ ապտակ,
Որ սարդերը սարդոստայնով
Թրմփացին ոտքերի տակ:
– Ես կջնջեմ ձեր ցեղը ողջ,
Կվերանաք իսպառ, անհետ,
Որ չփորձեք էլ շփոթել
Բարությունս թուլության հետ:
5
ՃԱՄՓՈՐԴ ՎԱՌԵԿԸ
Աղվեսը գրեց մի երկար ուղերձ
Եվ հավանոցի պատին փակցրեց.
«Ուզում եմ գնալ մեծ զբոսանքի,
Վայելել համն ու բերկրանքը կյանքի:
Հարկավոր է ինձ ձեր միջից ընտրել
Հետս ճամփորդող մի ազնիվ ընկեր:
Կտամ բարձր գին, չեմ լինի ժլատ,
Ոսկեհատ կուտն էլ կլինի առատ:
6
Թագուհու նման կպահեմ նրան,
Հագի ծիրանին՝ վառ ու հուրհան:
Ծեր եմ ես արդեն եւ չունեմ ժառանգ,
Եղածս իրեն կթողնեմ կտակ»:
Երբ հավերը այս գիրը կարդացին,
Աղվեսի վրա կուշտ քրքջացին.
– Քեզ է՞լ հավատանք, շա՜տ էլ որ հավ ենք…
Մեծերի խոսքը կտրեց մի վառեկ.
– Ի՞նչ կա այս տաղտուկ, գորշ հավանոցում,
Ձեր կյանքը փոխել ինչո՞ւ չեք փորձում:
Ես համաձայն եմ այդ աշխատանքին,
Գնամ, միջավայր մտնեմ մի կարգին։
Եվ պայման կնքեց նա աղվեսի հետ,
Որ ճամփա ընկնեն հենց վաղը եւեթ:
Ինչ ուներ-չուներ, հավաքեց, կապեց,
Մախաղը ուսին՝ վաղ ծեգին կանգնեց:
Աղվեսը եկավ ճիշտ ժամանակին՝
Քնքուշ, սիրալիր ժպիտը դեմքին,
Թեւանցուկ արած վառեկին հիմար՝
Տարավ, որ շրջեն աշխարհեաշխարհ…
Մեծ զբոսանքը տեղում վերջացավ,
Երբ «բարերարը» բուն գործին անցավ:
Ճամփորդ վառեկից թողեց հիշատակ
Փափուկ բմբուլն ու մախաղը դատարկ:
7
ԹԻԹԵՌՆԻԿՆ ՈՒ ՄԵՂՈՒՆ
Թիթեռնիկին ասաց մեղուն.
– Ինչո՞ւ ինձ հետ դու չես խաղում:
Չեմ գնալու այսօր գործի,
Արի՛ խաղանք պահմտոցի։
Տե՜ս, թե ինչքան զառ-վառ, գույն-գույն
Ծաղիկ ու թուփ կա մեր այգում:
Բայց չեմ քաղի այսօր նեկտար,
Հանգստյան է օրն ինձ համար:
8
Համաձայնեց թիթեռնիկը,
Հաշվեց մեկից մինչեւ հինգը,
Ամուր փակեց նուրբ աչքերը,
Մինչ պահ մտներ ոսկեթեւը։
Թռավ մեղուն ու գտավ փակ
Նորափթիթ ծաղկեպսակ։
– Թիթե՜ռ, թիթե՜ռ, դե՛, տեսնեմ քեզ,
Գլուխ գովիր, թե ինձ գտնես:
Ծաղկի գրկում ախորժելի
Մեծ բաժակ կար՝ նեկտարով լի։
– Մի՛շտ ճիշտ տեղում,– ցնծաց մեղուն,–
Բախտս ձեռքից բաց չեմ թողնում:
Իսկ երբ հյութի համն էլ առավ,
Թիթեռն իսպառ մտքից թռավ:
Կիսատ թողած պահմտոցին՝
Իսկույն անցավ իր լուրջ գործին:
Էլ ի՜նչ թիթեռ, էլ ի՜նչ հանգիստ,
Զբաղված է ինքը շատ խիստ:
Եվ պաշարը օրվա բեղուն
Շալակն առած՝ թռավ մեղուն:
Իսկ անտեղյակ թիթեռն էլ խեղճ
Ընկերոջն էր փնտրում անվերջ,
Բայց չէր գտնում կորած մեղվին,
Քիչ էր մնում ճաքեր լեղին:
Փնտրտուքից անչափ հոգնած,
Բերանը չոր, աչքերը թաց,
Տխուր-տրտում ու գլխահակ՝
Մթին մտավ մի թփի տակ։
Խորունկ ցավ էր սիրտը ընկել.
Կորցրել էր մի լավ ընկեր…
9
ՈՒՂՏՆ ՈՒ ԿՐԻԱՆ
Ուղտին ասաց մի ծեր կրիա.
– Բարձրահասա՛կ իմ հարեւան,
Ի՞նչ ես դնում դու շարունակ
Զույգ սապատդ հարվածի տակ,
Հարթում այլոց կռիվ ու վեճ,
Անվերջ ընկնում կրակի մեջ:
Հաշտեցնում ես ու խրատում,
Ու վերջում էլ քեզ են դատում,
Թե՝ կողմնապահ եղավ, տեսա՞ր,
Մեզ նախատեց անհավասար:
Թող ջլատեն լավ մեկմեկու,
Հաղթանակին կտիրես դու։
Լսեց ուղտը երկնասլաց
Եվ հեգնանքով նրան ասաց.
– Զարմանում եմ, կրիա՛ եղբայր,
Քո մորթապաշտ վարքի համար:
Թաքնվում ես պատյանում գորշ,
Մինչեւ անցնի պահն անախորժ:
Թե երկնքից ցած թափվի հուր,
Չես հասցնի դու մի կում ջուր
Շուրթը ճաքած որթին պապակ,
Բայց խաղողը կուտես անհագ…
Որ տեղն էլ գա, քեզ կգովես,
Թե. «Վազերը տնկել եմ ես»:
Մի՛ յուրացրու փառքն անվաստակ,
Ե՛լ դարանից, ապրի՛ր շիտակ:
Հոգսը կիսի՛ր քո դրկիցի,
Ճիշտ խոսքից էլ մի՛ նեղացիր։
10
ԱԳԱՀ ԳԱՅԼՈՒԿԸ
Գայլը, մի մաքի իր մեջքին առած,
Սարից հեւիհեւ մի կերպ իջավ ցած.
– Ձագերս կուտեն կուշտ այս իրիկուն,
Հոգ չէ, որ այսքան մնացի անքուն։
Երբ փորձեց որսը կիսել հավասար,
Կրտսեր գայլուկը սկսեց ոռնալ.
– Տո՛ւր ինձ ամբողջը, նորի՛ց գնա սար,
Հոտից փախցրու մեկն էլ ձեզ համար:
Մայրը թախծադեմ ասաց ձագուկին.
– Այսպես հոգնատանջ ո՞նց գնամ կրկին.
Հովիվն իր շան հետ հսկում է հեռվից,
Թե որ նկատեն, վայը տարավ ինձ։
Մոր խոսքը թողած բերանում կիսատ՝
Ձագուկը մաքին հասցրեց բացատ:
Մայրը զայրացած կլանչեց ցավից,
Քմծիծաղ տվեց ագռավը դրկից.
– Որդուդ կոկորդին դեմ չառա՞վ ոսկոր,
Երբ եղբայրներն են քաղցած քանի օր:
Նման արարքից ես չեմ զարմանում.
Պատճառը փնտրիր անցյալիդ խորքում։
Ագահությունը ձեր արյան մեջ է,
Անկուշտ գայլուկին հալածել պետք չէ։
Ես շա՜տ երկար եմ ապրել ու տեսել
Եվ մեղադրել եմ բազմիցս քեզ էլ,
Սովոր եք պատառ իրարից խլել,
Ուստի կարող ես ձագուկիդ ներել…
11
12
ԳԵՏԱՁԻՆ ՈՒ ՁՈՒԿԸ
Մի մեծամիտ ձուկ պուտպուտիկ
Լող էր տալիս ափին մոտիկ,
Երբ տեսավ մի գեշ գետաձի,
Խաժ աչքերը լայն բացվեցին։
– Միայն սա էր պակաս այստեղ
Իր անճոռնի տեսքով անգեղ:
Մի տես ո՜նց էլ նայում է ինձ,
Չի էլ խորշում ինքն իրենից…
13
Գետաձին դա թեպետ լսեց,
Չլսելու իրեն տվեց,
Քանի որ սեւ մի շնաձուկ
Մոտ էր եկել նրանց ծածուկ:
Ձկան պոչի հետեւում էր,
Ագահորեն հետեւում էր
Շնաձուկը մեծաբերան,
Որ պահ առաջ կուլ տա նրան:
Չնայելով իր զանգվածին՝
Արագ հասավ գորշ գետաձին,
Կճղակներով այնպես խփեց
Շնաձկան բաց երախին,
Որ երախը ընդմիշտ փակվեց՝
Չհասնելով մեր ձկնիկին:
Իր տեսածից խիստ վախեցած՝
Գետաձիուն ձկնիկն ասաց.
– Ների՜ր դու ինձ, բարի՜ հսկա,
Որ լեզվիս տակ ոսկոր չկա:
Մեծ պատիվ է ինձ այսուհետ
Ընկերություն անել քեզ հետ…
14
ԲՈՒՆ ԵՎ ԱՐԱԳԻԼԸ
Ամեն օրվա մութն ընկնելիս՝
Բուն չղջիկին հյուր էր գալիս:
Փնթփնթանը այդ չարամիտ
Որոնում էր պատեհ առիթ՝
Ընկերոջ հետ իր բախտակից
Բամբասելու դեսից-դենից…
Սիրած թեման միայն մեկն էր՝
Արագիլին դատափետել։
– Ախր ո՞վ է էդ լողլողը,
Լճակի շուրջ ցատկոտողը,
Երկարավիզ, անբարետես,
Որ վերեւից է նայում մեզ…
Մայրամուտին քուն է մտնում,
Լուսաբացին՝ գորտեր փնտրում,
Ամեն բանում՝ մեզ հակառակ.
Դե, մի խոսքով՝ չտես, անհագ:
Որդ ու ճիճու ուտողի՜ս տես,
Որ բանի տեղ չի դնում մեզ…
Պա՜հ-պա՜հ-պա՜հ-պա՜հ… Բա շորե՜րը,
Սեւ ու ճերմակ փետուրնե՜րը։
Դրա՜ն նայիր, էդ չորկողին,
Օձ ու մողես խժռողին…
Չարախոս բուն բվա՜ց, բվա՜ց,
Չդադարեց մինչ լուսաբաց։
Տուն դառնալիս բամբասկոտը
Բախվեց քարին, կոտրեց ոտքը:
Խարխափելով ճահիճն ընկավ.
Դե, չի տեսնում լույսով բնավ։
15
Վայեց, կանչեց նա սրտաբեկ.
– Կործանվո՜ւմ եմ, վա՜յ, ինձ փրկե՜ք…
Կռնչյունը աշխարհն առավ…
Չղջիկն իսկույն հեռու թռել
Հազիվհազ մի ծերպ էր գտել,
Սողոսկելով մեջը մտել,
Իբր ոչինչ չի իմացել…
Էլ չխոսեմ երկար-բարակ,
Արագիլը հասավ արագ,
Կափկափելով գործի գցեց
Երկար վիզը, կտուցը մեծ,
Բուին ճահճից մի կերպ հանեց՝
Վնասելով զույգ մագիլը։
Այո՛, հենց օձ ու գորտ ուտող
Իր աչքի փուշ Արագիլը:
16
ՈԶՆԻՆ ՈՒ ԿՐԻԱՆ
Ամռան մի օր՝ կեսօրին շոգ,
Երբ նեղում էր տոթն անողոք,
Հանդիպեցին ոզնին, կրիան
Սարալանջի լճակի մոտ։
– Բարո՜վ եկար, փշո՛տ ընկեր,
Էլ չես գալիս կողմերը մեր,
Քեզ հո վատ բան չի՞ պատահել.
Մոռացել ես խեղճիս ահել:
– Ի՞նչ ես ասում, հի՛ն բարեկամ,
Քեզ կայցելեմ, քանի դեռ կամ:
Դեմն աշուն է, հետո ձմեռ,
Չեմ ամբարել պաշարս դեռ…
Ես կոճղի տակ այս հաստափոր
Փորել եմ մեծ, հսկա մի հոր։
– Շատ լավ տեղ է` բաց, արեւոտ,
Իմ բնին էլ՝ ահագին մոտ:
Կուզե՞ս, ես էլ, ոզնի՛ եղբայր,
Քեզ մոտ դիզեմ ձմռան պաշար:
– Ընկերովի մահն էլ անգամ
Հարսանիք է, ի՛մ բարեկամ:
Կօգնեմ՝ փորես մի հոր, անշուշտ,
Ամբողջ ձմեռ կլինենք կուշտ:
Մի ամիս անց երկու ընկեր
Սկսեցին կեր կուտակել,
Ոզնին բերք էր կրում փութով,
Դանդաղաշարժ գորշ կրիան էլ
Պեղում էր լուռ լճակը խոր
17
Ու հավաքում ջրիմուռ, որդ:
Տանջվում էր ոզնին անվերջ,
Իսկ կրիայի բաժնեմասը
Խոյանում էր վեր օրեցօր:
Խիստ կասկածեց ոզնին նրան
Մի օր էլ լուռ մտավ դարան՝
Տեսնի՝ ինչ է անում կրիան.
Պակասում է բերքն իր այդպես,
Իսկ նրանը դառնում է դեզ:
Եվ ի՜նչ տեսավ ոզնին հանկարծ.
Որկրամոլը այդ ծերացած
Խժռում է ավարը իր:
Նա հասկացավ այդ տմարդին,
Ասաց շատ լուրջ.
– Ագահ ես դու, նաեւ նենգոտ,
Թող եղածը մնա քեզ մոտ,
Ես կգնամ նոր պաշարի,
Բայց խրատն այս
Թող որ մնա քեզ որպես դաս.
Դու լավ գործդ, վատը նաեւ
Դիր կշեռքի զույգ նժարին,
Սովորիր քեզ կողքից նայել։
18
ԱՆՇՆՈՐՀԱԿԱԼ ՀՅՈՒՐԵՐԸ
Կարմրագլուխ մի սունկ ճերմակ
Կանգնած էր հորդ անձրեւի տակ,
Ներս էր կանչում մեղմ ժպիտով,
Ով անցնում էր իր տան մոտով:
Սկյուռ, ոզնի ու նապաստակ
Մտան տաքուկ գլխարկի տակ,
Եկավ թրջված դաշտամուկը,
Նրան էլ տեղ տվեց սունկը:
Մեկ էլ կաղնու ճյուղից թռավ
Ու մոտ եկավ մի սեւ ագռավ,
Որին նրանք չէին սիրում.
Ավել-պակաս շատ էր կռռում:
Թեեւ ծածկը փոքր էր ու նեղ,
Սունկը նրան էլ հանդուրժեց,
Իրեն նեղեց ու տվեց տեղ:
Կռվարարը եկավ թե չէ,
Բոլորի հետ փորձեց վիճել,
Խփել, հրել սրան-նրան,
Ինքը՝ չար ու մեծաբերան:
Չդիմացավ քեռի ոզնին,
Մի լավ քոթակ տվեց վզին,
Դե, ագռավն էլ չմնաց տակ,
Ոզնու դեմքին իջավ ապտակ:
Այնքան իրար հրմշտեցին,
Տանտիրուհուն վայր գցեցին:
Անօգնական սունկը մեր խեղճ
Ընկավ ջրի ու ցեխի մեջ:
19
20
Իսկ անձրեւը հորդում էր դեռ,
Երախտամոռ հյուրերն էլ
Շտապեցին նոր տեղ գտնել,
Սունկին թողած ընկած այդպես՝
Ճողոպրեցին անմիջապես:
Սունկը նրանց ոչինչ չասաց,
Ծածուկ սրբեց աչքերը թաց:
Ապերախտին հիմա սունկը
Էլ չի ների, որ իր գլխին
Նոր փորձություն նա չբերի։
21
ԹՐԹՈՒՐՆ ՈՒ ԽԽՈՒՆՋԸ
Ծույլ խխունջը կեր էր փնտրում,
Երբ որ տեսավ թրթուրին շեկ,
Հեգնեց, ծաղրեց, անվանեց որդ,
Խայթեց լեզվով իր չար ու նենգ:
– Ինչքա՜ն գեր ես, անբարետես,
Անխնամ ես ու մազմզոտ,
Տես, թե քեզնից ոնց են խորշում
Այստեղ ամեն ծաղիկ ու խոտ:
22
– Այդ քեզնից են սաստիկ գարշում,
Ա՛յ պոզավոր դու լպրծուն,
Գետնաքարշ ես ծնված օրից,
Շրջապատը դու ես պղծում:
Մտի՛ր խեցուդ մեջ, պարփակվի՛ր,
Թունոտ լեզուդ դի՛ր փակի տակ,
Իմ տեսքով մի՛ մտահոգվիր,
Կլինեմ ես շուտով հարսնյակ:
Թավշե թեւեր կառնեմ գույն-գույն,
Նուրբ թիթեռնիկ ես կդառնամ,
Կապրեմ ուրախ ծաղկանց մեջ բյուր՝
Բուրումնավետ ու աննման:
Նեկտար կառնեմ անուշահամ,
Հովերը ինձ մեղմ կօրորեն,
Ու կունենամ հեքիաթային
Վայելքներով չքնաղ օրեր:
Իսկ դու ցմահ պիտի մնաս
Սողուն այդպես, բայց միշտ հիշիր՝
Երբ չես տեսնում թերությունդ,
Մի՛ քարկոծիր դու ուրիշին։
23
ՄՈԾԱԿՆ ՈՒ ՄԵՂՈՒՆ
Ամբարտավան մի գեշ մոծակ՝
Լեզվի կապ ու սանձը արձակ,
Ծաղիկների մեջ բզբզում
Ու նեկտար էր խորքից ուզում։
Երբ որ լրիվ ծաղկին պարպեց,
Վայելումը զարմանք էր մեծ։
Պարկապզուկ սարքեց փորը
Այդ աչքածակ որկրամոլը:
Շատ ուտելուց սիրտը խառնեց,
Ծաղկանց վրա մեղքը գցեց։
– Թո՜ւ, այս ի՞նչ էր՝ տի՞ղմ, թե՞ նեկտար,
Ինձ ցավեցրիք դիտավորյալ,
Զզվելի էր ու գարշահոտ,
Դուք ծաղի՞կ եք, թե՞ մոլախոտ…
Կբարբաջեր նա դեռ երկար,
Թե որ մեղուն այդ կողմ չգար.
Նուրբ նեկտարով բեռնավորված՝
Գոհություն էր հայտնում ծաղկանց։
Դժգոհ դեմքով մոծակն ասաց.
– Է՜յ, շողոքորթ, անմի՛տ մեղու,
Շատ շռայլ չե՞ս գովքդ զեղում…
Տես, չկանչեմ մորեխներին,
Գան, ձեզ պատժեն տեղը տեղին:
Ափերից դուրս ելավ